तलका अनुच्छेद पढ़ी सोधिएका प्रश्नहरूको उत्तर दिनुहोस् :

शिक्षा उत्पादनमूलक हुनुपर्ने कुरामा विश्वको ध्यान केन्द्रित भइरहेको अहिलेको अवस्थामा हाम्रो मुलुकले पनि प्राविधिक शिक्षाका लागि ठोस कदम चाल्नुपर्ने देखिन्छ । कृषिप्रधान देश नेपालमा कृषि विशेषज्ञको अभाव हुनु, पशुपालन तथा अन्य व्यवसायमा देखापर्ने समस्याको निराकरणका लागि विदेशबाट तालिमप्राप्त जनशक्ति भिकाउनुपर्ने अवस्था हुनु निकै दुःखको कुरा हो । प्राविधिक तथा व्यावसायिक शिक्षाको अभावका कारण देशको अर्थतन्त्र सवल हुन सकिरहेको छैन । केही तालिम लिएका तथा सिप आर्जन गरेका जनशक्तिलाई पनि उचित पारिश्रमिक दिन नसक्दा तिनीहरू पनि कामको खोजीमा विदेश जान बाध्य छन् । यस्तो अवस्थालाई रोक्नका लागि राज्यस्तरबाट नीतिनियम बनाउनु र कार्यान्वयन गर्नु आवश्यक देखिन्छ । प्राविधिक शिक्षा युगको माग हो भने नेपालजस्तो देशको विकासका लागि पहिलो सर्त पनि हो । जुन मुलुकमा प्राविधिक शिक्षा प्राप्त गरेका जनशक्ति जति धेरै छन् ती मुलुक त्यति नै समृद्ध छन् । प्राविधिक जनशक्ति धेरै भएका राष्ट्रले भौतिक र आर्थिक विकासमा आफूलाई अग्रस्थानमा उभ्याउन सफल भएका छन् । हातमा सिप र पाखुरीमा जाँगर भएका जनताको परिश्रमबाटै मुलुक आर्थिक विकासको सोपान चढ्ने भएकाले प्राविधिक शिक्षा नेपालका लागि अपरिहार्य बनेको छ । प्राविधिक शिक्षा प्राप्त गरेका जनशक्तिले विश्वको जुनसुकै कुनामा पुगेर पनि बेरोजगार बस्नुपर्दैन । कुनै प्रकारका सिप वा तालिम प्राप्त गरेर विदेश गएका नेपालीहरूले पनि राम्रो रोजगारी पाएका छन् । सिप नभएकाहरूले भने केवल सामान्य मजदुरी तथा थोरै आम्दानी हुने कठोर श्रम गर्नुपरेको छ ।

प्रश्नहरू:

(क) कतिपय जनशक्ति विदेश पलायन हुनुको कारण के हो ?

(ख) मुलुकले कसरी आर्थिक र भौतिक समृद्धि प्राप्त गर्न सक्छ ?

(ग) कुन प्रकारका जनशक्तिले विदेशमा कठोर श्रम गर्नुपरेको छ ?

(घ) आर्थिक विकासको सोपान चढ्नु भनेको के हो ?

(ङ) आजको युगको आवश्यकता के हो ?